లాలి లాలి మా బాల శిశువుకు..

 ఉయ్యాల్లో బాలకు  జోల పాట.
__________________

లాలీ లాలీ ........
లాలి లాలిమా బాల శిశువుకూ
లీలా శిశువీ మోహన బాలకు ॥ లాలీ ॥

సడులుమాని గుసగుసలు మాని
ఓ.. సఖియలార ఒద్దికగా నిలువరె
కలతనిదురలో తీపికలలతో
ముసినగవుల  నిదరోయే మా బాల ॥ లాలీ ॥

ముత్తమ్మ  తొడిగిన మురుగుల ముంజేయి  
ముచ్చట గొలుపగ ముదితలు మురియగ
ముద్దుల వానలొ తడిసిన మా బాల
మురిపెపు నగవుల మురిసి నిదరోయె ॥ లాలీ ॥

తాతప్పలందరు తడవుతడవుగా
తట్టిలేపుచూ కానుకలిడగా
అమ్మా,నాన్నల అనురాగపు సిరి
అందిన మా బాల అలసి నిదరోయే ॥ లాలీ॥

తాతయ్య దీవింప తారలు దిగివచ్చె
నానమ్మ మురిపాలు వెన్నెలలు కురిపించె
అమ్మ అమ్మ ఒడి , తాత ముద్దు సడి
మరిగిన మా బాల మారాము సేయక ॥ లాలీ ॥

మేనత్త శైలజ మురిపాలు మీరగ
మేని బంగరు తొడుగులనిడగ
పుత్తడి మెరపుల అందాలు విరియగ
మా యింట వెలసిన మహలక్షికీ జోల ॥ లాలీ ॥
________________________________










 
                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                        

శశి పున్నమి కళలు పంచ..

బాంగారు మా పాపకు శ్రీరామరక్ష .
-----------------------------------------

శశి  పున్నమి కళలు పంచ
మృధు తారల తళుకు 

 మేని మెరుపులు కాగా
పలు వన్నెల కాంతులతో
పదునారగు కళల  వెలుగు

 పాపను కనరే ॥

పూరించిరి  శంఖములదె
భావించిన  బిరుదు

 భాగ్య ఫలముల నిడగా
పేరెంచిరి  సురలు, మునులు
దీవించిరి దేవతలదె  

దీర్ఘాయువులన్ ॥

విద్యలందు మేటిగమను
పెద్దలందు 

ప్రేమనుగొను పేరెన్నికతో
శుద్ధమైన  సంస్కారపు ,

సాంప్రదాయ  పద్ధతినిల 

శుభములు గొనుమా॥

సంగీతము, సాహిత్యము
రంజిల్లెడు నాట్యగతులు 

రసములు కాగా
సుందర  వదనారవింద-
అందములానందహేల -

నందరు గనరే  ॥

శ్రీవాణియె కరుణింపగ
సిరులతల్లి శ్రీలక్ష్మియె

 సంపదలిడగా....
శ్రీగౌరియె దీవించెను
సౌభాగ్యములిలను పొంద 

సంతోషముగా ॥

బాలభాను కిరణరీతి
వేల నుతుల కీర్తి వెలుగు 

వేడుకలిడగా....
లీలలెన్నొ  చూపించుచు
బాల వేల వసంతాల -

వర్ధిల్లెనుగా ॥

____________________________

పాపకు నామకరణ మహోత్సవ సందర్భ సమయం లో
నాన్నమ్మ (పుల్లాభట్ల జగదీశ్వరీమూర్తి)
ఆశీర్వదిస్తూ .. ప్రేమతో జల్లిన పద్యాక్షతలు .