___________
చిరు నవ్వుల వన్నెల సిరి సీతను చూచీ
సిరి వెన్నెల సిగ్గు పడెను కాంతులు బాసి
తరగని వన్నెలు కోమలి ముఖమున గాంచీ
నెలరాజే నీరసపడే కళలను బాసి !
చారెడు కాటుక కన్నుల సొగసులు చూసి
ముకుళించెను కలువ భామ ,మూతిని ముడిచి
విలుబోలిన కనుబొమ్మల విరుపును చూచి - శరము
కనుపాపల చిక్కు పడెను వింటిని బాసి !
ఎరుపెక్కిన పెదవులు రస మధురిమ లిడగ - ముద్ద
మందారములూసులాపే మనసు మూగగ - కలికి
పలువరుసల మెరపులు చిరు కాంతులీనగా- దాగె
ముత్యపు సరులన్ని సాగరాన చాటుగ !
వాలు జడల కురుల సఖులు నాట్యము లిడగ - తాచు
పాములు కుబుసములు విప్పే జతను చేరగ - చెదరు
ముంగురులే భ్రమరములని భ్రమసి ప్రేమగ- కమల
ముఖ కన్నియ కళలు విడెను మధువు పంచగ !
బంగరు వన్నెల కోమలి సొగసులు చూచి
పచ్చాని చేమంతి ఒదిగే రేకులు ముడిచి - ఇంతి
కుకాముల కుంభముల జారు పైటను చూచి
సిగ్గు పడెను శిఖరములే బిగువులు బాసి !
పొలది మేని కులుకులు పలు కళల తేలగ - మింట
హరివిల్లులె హొయలు వీడె గుండె బరువుగ
ఊయలలా ఊగు నడుము జిలుగులు చూచి - దాగి
సంభ్రమాన చూచె లతలు గుసగుసలాపి !
మల్లెలు, జాజులు మేలిమి ముసుగులు వేసే - ముద్దు
ముచ్చటలిడు మృదు పదముల జాడలు చూచి - కలికి
నడకల నిడు నవ రసముల భంగిమ చూచి - నెమలి
కన్నియలె నివ్వెరపడే నాట్యము మరచి !
అంతలో ........
అందానికి బంధము పడె ,అడుగు తడబడె - అదురు
బెదురు కనుల చూడ్కుల అలివేణి నిలబడె- చెదరు
సౌందర్యపు రాశి కనులు సిగ్గు లోలికెగా - నవ
మన్మధ సుందరుని రామ చంద్రుని కనగ !
తోలి వలపుల చూపుల తూపులను నిలుపగ - పూల
శరములు విడే మన్మదుడదే మంచి క్షణముగ - సీతా -
రాముల కళ్యాణ మిలను కనులు పండగ - ప్రక్రుతి
పడతి సఖులు సహజ రీతి కళలు నిండేగ !!
రచన - పుల్లాభట్ల జగదీశ్వరీమూర్తి .
No comments:
Post a Comment