మమ్మేలు మా నాధ

ఓం శ్రీ సాయి రాం .
-----------------------
ఆనందభైరవి రాగం .
---------------------

మమ్మేలు మా నాధ     శ్రీ సాయి నాధా
మా ఇంటి వెలుగువూ   నీవు కాదా ......
కమ్మేటి  చీకటుల        తొలగింపగా నీవు
నమ్మేటి దైవమై           మమ్మేలరాదా ....
                                 శ్రీ  సాయి నాధా ....||

అంబ కృప  నీ పైన       అది నీకు వరమూ
నింబ వృక్షము క్రింద    నిత్యమ్ము జపము
లోకాలు గాచుటకు       చేసేటి   తపము
ఫలియించి  పొందేవు     దైవత్వము            || మమ్మేలు ||

కన్నీరు తుడిచేవు        పన్నీరు చిలికేవు
నోట నెంగిలి నీట          దీపాలు నిలిపేవు
గంగ ,యమునల నీరు  పాదాల పుట్టించి
పాపాలు కడిగి మము    పావనుల జేసేవు   || మమ్మేలు ||

ఉప్పు నీటిని  తేట  తీయన్ని నీరుగా
మార్చేవు మహిమతో ,మధురాతి మధురముగ
ప్లేగు ,కలరా వ్యాధి       బాప గోధుమ పిండి
ఊరంత  చల్లేవు          పురజనుల కాచేవు   || మమ్మేలు ||

గీతార్ధ సారమును       బోధించినావూ 
నిస్వార్ధ  సేవలను       అందించినావూ
పరమార్ధమును దెల్పి  పావనుల గావింప
పదకొండు సూత్రాల     నెరిగించినావూ ...
                                పరమాత్మ నీవూ ......|| మమ్మేలు ||

---------------------------------------------------------------
----------------------------------------------------------------