నా పాటల పుస్తకానికి సదయ్య గారు , కుందారపు గురుమూర్తిగారు, వేణుగోపాల్ గారు రాసిన ముందుమాటలు

అభినందనలు

         శ్రీమతి పుల్లాభట్ల జగదీశ్వరీమూర్తి గారు సమకాలీన కవయిత్రులలో పేరుపొందిన కవిశిఖామణి.సంగీతజ్ఞులు.వీరు మా మహతీ సాహితీ కుటుంబ సభ్యులైనందుకు మాకు గర్వకారణం.వీరు నాకు మాతృసమానులు.వీరి పుస్తకానికి పిన్నవాడినైన నేను అభిప్రాయం రాయడం నా పురాకృతపుణ్యంగా భావిస్తాను.మహతీ సాహితీ కవిసంగమం-కరీంనగరం యొక్క "వంద కవితల పండుగ"లో  పాల్గొని "శతకము"ను పూర్తి చేసిన సందర్భంగా జగదీశ్వరీమూర్తి గారికి శుభాకాంక్షలు.

       శ్రీమతి పుల్లాభట్ల జగదీశ్వరీమూర్తి గారు గతంలో మహతీ సాహితీలో తమ విలువైన సమయాన్ని కేటాయిస్తూ క్రమం తప్పకుండా క్రమశిక్షణగా ఎన్నో రచనలు చేసారు.వీరు మహతీ సాహితీ ద్వారా ఎన్నో ప్రశంసాపత్రాలు,సన్మానాలు,బిరుదులు పొందారు.వీరు నా ఇష్టపది ప్రక్రియకు వన్నెతెచ్చారు.వీరు ఇష్టపది ప్రక్రియలో "భగవద్గీత" మరియు "రామాయణం" రాయడం జరిగింది.

      శ్రీమతి పుల్లాభట్ల జగదీశ్వరీమూర్తి గారి ఈ పుస్తకం ఒక సంగీత కళాఖండం.నాకు సంగీతంపై పరిజ్ఞానం లేకపోయినా కానీ వారి పాటలలోని మాధుర్యాన్ని, ఆధ్యాత్మికతను, భక్తి భావాన్ని ఆస్వాదించాను.ఇందులో శ్రీ కృష్ణ గానామృతం ఒక మధురాతిమధురమైన పాటలసంపుటి,జయదేవుని అష్టపదుల వలె నిజంగా గానామృతంలో ఓలలాడిస్తుంది.ఇంకా పెళ్ళిపాటలు,వియ్యాలవారి కయ్యాలు,దేశభక్తి గీతాలతో ఈ పుస్తకం విభిన్నతను సంతరించుకున్నది.గోదాదేవి తిరుప్పావై పాశురాలు అద్భుతంగా జగదీశ్వరీమూర్తి అమ్మవారి పాటల్లో కుదురుకొని ఆ పాశురాల భావాలు తెలుగు పాఠకులకు అవగతమయ్యాయి.

    శ్రీమతి పుల్లాభట్ల జగదీశ్వరీమూర్తి గారి ఈ పుస్తకరాజం తన కవిత్వం మరియు సంగీతం ద్విగుణాలతో  పాఠకలోకాన్ని అలరిస్తుందని ఆశిస్తున్నాను.వీరు తమ కవితాప్రతిభను ప్రదర్శిస్తూ మరిన్ని కవితాసంపుటులు వెలయించాలని ఆకాక్షిస్తూ...

మీ సాహితీ పిపాసి

డాక్టర్ అడిగొప్పుల సదయ్య

వ్యవస్థాపక అధ్యక్షుడు

మహతీ సాహితీ కవిసంగమం-కరీంనగరం

*మనసు పలికిన మాట*

*********************

*వాగర్థా వివ సంపృక్తౌ వాగర్థ ప్రతిపత్తయే*

*జగతః పితరౌ వందే పార్వతీ పరమేశ్వరమ్*

*పాఠక మహాశయులందరికీ నమస్సులు.*

*శ్రీమతి పుల్లాభట్ల జగదీశ్వరి మూర్తి గారు.. ప్రఖ్యాత రచయిత్రి, కవయిత్రి, సంగీత సరస్వతి, గాయని, ఆధ్యాత్మికవేత్త... వారు గత కొన్నేళ్లుగా మహతీ సాహితీ కవిసంగమం సమూహం ద్వారా పరిచయం.. చక్కటి పదాలను ఉపయోగించి చిక్కటి కవిత్వాన్ని ఒలికించడంలో వారు అందెవేసిన చెయ్యి. సాధారణ కవులు, కవయిత్రులకు భిన్నంగా.. రాగ,తాళ, లయలకు అనుగుణంగా పదాలను పేర్చడంలో.. కూర్చడంలో వారు దిట్ట. నేడు ఈ పుస్తకానికి ముందుమాట రాసే అవకాశం నాకు లభించడం ఆ సరస్వతీదేవి వరప్రసాదం గా భావిస్తున్నాను.*

*సహజంగా శ్రీకృష్ణుని భక్తురాలు అయిన శ్రీమతి జగదీశ్వరి గారు.. వారిపై అద్భుతమైన పది పాటలతో ఈ సంపుటిని ప్రారంభించారు.. కృష్ణుని యందు అమితమైన భక్తి, వారి రచనలకు ఒసగింది అమితమైన శక్తి.. వారికి ఆ వేణుగోపాలుని యందు ఉంది కదా అమితమైన అనురక్తి..*

*మధురా నగరిలో.. ఏడే మాధవుండు.. బృందావన మది అందరిదీ.. ఒక్కొక్క పాట ఒక్కో రసగుళిక.. అని చెప్పవచ్చు*

*శ్రీకృష్ణ గానామృతం పేరుతో వీరు నిజంగా చదివిన వారికి హృదయాలకు విందు చేశారని చెప్పాలి*

*పిమ్మట పెండ్లి పాటలను ఎంచుకున్నారు.. పెండ్లికొడుకు రాక నుండి అమ్మాయిని అప్పగింతలు పెట్టి అత్తవారింటికి సాగనంపే వరకు ప్రతి ఘట్టానికి ఒక పాటను కట్టారు.*

*చాలా అద్భుతంగా సాగిన ఈ గానప్రవాహినిలో తదుపరి అంశాలుగా దేశభక్తి, దైవభక్తి తీసుకున్నారు.. భారతమాతకు నీరాజనం ఒకవైపు.. విశ్వశాంతికై మరోవైపు పిలుపు.. చాలా బాగున్నాయి.*

*చివరగా ధనుర్మాస ప్రాశస్త్యం వివరిస్తూ ముప్పై రోజులకు ముప్పై పాశురములను చక్కటి భావంతో వివరణాత్మకముగా.. పాడుకోవడానికి అనుకూలంగా రచించారు.. చదువుతుంటే.. భక్తి పారవశ్యంతో తనువు మనసు పులకించిపోతాయి.*

*ఇటువంటి పాటల పుస్తకం బయట దొరకడం చాలా అరుదు.. సాహితీ సౌరభాలను వెదజల్లే ఈ గీతాసుమాలను ఒక మాలగా కూర్చడంలో శ్రీమతి పుల్లాభట్ల వారు కృతకృత్యులయ్యారనే చెప్పాలి.. వారు ఇటువంటి పుస్తకాలను మరెన్నో వెలువరించాలని.. తెలుగు పాఠకులను మరింతగా అలరించాలని కోరుకుంటూ.. ఈ అవకాశం లభించినందుకు మరోమారు ధన్యవాదాలు మరియు అభినందనలు తెలుపుకుంటూ..*

*మీ*

*వేణుగోపాలుడు*

🙏🌹🙏🌹🙏

'పాట పాటలో పరమాత్మ పరవశించె'

సీ: మధురానగరితో సుమధురముగ మొదలై

           మురళి గానముతోడ ముగిసి  మురిసె

     మధురాధి పతియైన మంగళకరుడైన

           మాధవు రూపంబు మదిని వెలిగె

     గోపాల బాలుడా! గోవిందుడా!యని

          పాడుగ మెనెల్ల  భక్తి నిండె

    శ్రీకృష్ణ లీలలు చిత్తమున నిలచె

            గాత్రంబునన్ సరిగమలు వలికె

తే: పాట పాటలో పరమాత్మ పరవశించె

     పదము పదములో సాహిత్య పటిమ తెలిసె

      పదును గలిగిన పాటలు పాడుచుండ

      నాదు మానసంబు మిగుల హ్లాదమొందె

కం వియ్యాల వారి పాటలు

     కయ్యాలననేల? వినగ  కమ్మని విందుల్

     సయ్యాటలేగద జనుల

     నెయ్యములనుబెంచుచుండు నేర్పున భువిలో

కం: శ్రీ పుల్లాబట్ల కలము

      ప్రాపకమయి నిల్చె భక్తి పాటలకెల్లన్

      రూపము భగవద్భక్తికి

      నీ పొత్తము. గణుతి కెక్కు నిదియునొకటిగాన్

కుందారపు గురుమూర్తి

భాషారత్న, పద్యకవి.

పాఠశాల సహాయకులు తెలుగు,

బలిజపల్లి,

కలసపాడు మండలం

వై.యస్.ఆర్ కడపజిల్లా.

ఆంధ్రప్రదేశ్.

7780656292

నా అభిప్రాయం.

పుల్లాభట్ల జగదీశ్వరీ మూర్తి గారు నాకు మహతి సాహితీ కవి సంఘమం ద్వారా పరిచయం. నాకు సోదరీ సమానులు.

 వారు ఈ పుస్తకానికి ముందుమాట వ్రాయమనడం నా భాగ్యంగా భావిస్తున్నాను . 

మహతి సాహితీ కవి సంగమం బృందంలో 100 కవితలు పండుగలో పాల్గొని శతకమును పూర్తి చేసిన సందర్భంగా జగదీశ్వరీ మూర్తి గారికి శుభాభినందనలు .

 ఒక గొప్ప రచయితగా కవయిత్రిగా ఎన్నో వివిధ ప్రక్రియలను అలవోకగా వ్రాస్తూ ఒక విశిష్టమైన స్థానాన్ని ఏర్పరచుకొని అక్షరాల అమృత ధారలు కురిపిస్తూ ఆ అమృత వర్షిణిలో ఓలలాడుతూ ,తన మనోభావాలను కవితాత్మకంగా చిత్రించి మంచి పదబాణిని ప్రయోగిస్తూ అలతి పదాలలో, అనంతమైన అర్థాలను ఇనుమడిస్తూ వ్రాసిన తెలుగు సంస్కృతి సంప్రదాయాల కలబోతయే మంగళకరమైన ఈ రాగామృతం.

"మధురా నగరిలో" మాధవుని గీతాలు, పిల్లన గ్రోవిలో మోహనరాగం మధురంగా వినబడుతుందని, మురళీ రాగమే కోకిల సంగీతం గా వినపడుతున్నదని వ్రాసిన ఉపమానం చక్కగా ఉన్నది .

విరహపు వేదనను వీనుల విందుగా అందంగా మెరిపిస్తూ, మురళీధరుని మోహన రూపము మనసంతా నిండిందని, ఆనందంగా మురిసిపోతూ, మాధవగీతమై మధురానగరిలో నిలిచిన  వైనం,  శ్రీకృష్ణ గానామృతానికి నిలువుటద్దమై నిలిచింది.

"ఏడే మాధవుడు" పాటలో, రాధ, శ్రీకృష్ణుని తోడుకోసం పరితపించినటువంటి విధానం ,విరహ వేదనతో  మూగవోయిన మనసులోని భావాలు సఖులుకు చెబుతున్నట్లుగా చక్కటి భావావేశం ప్రకటతమయింది

గోప బాలుడు గొల్లవాడు మోహన రూపుడు బృందావన వాసుడు ఆయన శ్రీకృష్ణుడి లీలల చేష్టలను తెలుపుతూ, గోపికల మనసు దోచిన విధానము ,నవరస మోహనా కారుడి స్తుతి అద్భుతంగా ఉన్నది.

"రాధా మాధవ మోహన " గీతాలాపనలతో, మధుర సుగంధాల మేలి ముసుగులతో, రాధమ్మ అందెలు ఘల్లు ఘల్లు మన కోయిల గీతాల కమ్మని తరంగాల సాగుతూ, మదిలో పన్నీటి జల్లులు కురిపించిన సప్తస్వర సుధా రాగ ఝరులను అష్టాచెమ్మల ఆటలలో అలవోకగా కురిపిస్తూ , యమునా తటిలో , మృదు మురళీరవముల లలిత భావనలలో, ఊయల లూగుతూ, సృష్టిలో రాధాకృష్ణుల ప్రేమకు అర్థం చెబుతూ, అజరమైన ప్రేమకు అద్భుతమైన సుధారస రాగాల పరవశంతో మంజుల మురళీరవ గీతాలు ,రాత్రి మురళి గానము పేరుతో మనసుకు స్వాంతన చేకూరుస్తూ ,మధురనాదమై సుధారస సారమై పరవశింపజేస్తూ , "గోపాల బాలుడమ్మ " శీర్షికతో గోపబాలుని అల్లరి చేష్టలు ఉదహరిస్తూ, నవరసాలు చిందిస్తూ, అజరామరమైన శ్రీకృష్ణ  లీలలతో  మురిసే యశోద లో.. అమ్మతనాన్ని చాటుతూ  వ్రాశారు .

భాషలో అమృతం కురిపిస్తూ ,అంత్యప్రాసలు పలికిస్తూ,

 అక్షరాల నందనవనంలో స్నేహ సౌగంధికాలతల "శ్రీకృష్ణ స్తోత్రం" చేస్తూ , ఆయన అభయహస్తాన్ని పొందుతూ, "వినిపించరా కన్నా" శీర్షికతో, మనసారా భగవంతుని రూపాన్ని సాక్షాత్కరిస్తూ , నుదుట కస్తూరి, పించముతో వదనాన్ని చూపిస్తూ, అక్షరాల భావాలతో మైమరపిస్తు,  కాళీయ నృత్యము, నాదరూప ఘన లీలా  మోహనుని ,నృత్య  గాన లహరిలో, గోపి ప్రియ లోలుని గురించి చక్కటి వర్ణనతో అద్భుతంగా వ్రాయడం , జగదీశ్వరీ గారి భక్తికి తార్కాణం.

"తపస్వి మనోహరం" గురించి వ్రాసిన పాటలో,  తరతరాల సాంప్రదాయాలు రంగరిస్తూ , కవయిత్రులందరికీ స్ఫూర్తి పెంచే కవులు కళాకారులతో "నిండు రస విభూషిణీ" అని చాటుతూ, చక్కటి "సమ భావలతో నిండు రస విభావరి ,తపస్వి మనోహరి " అంటూనే,  "సామూహిక రచనల కథాపీఠమై, నిత్య నూతనపు కాంతి తేజమై " సాగిపోతూ ఉంటుందని "తపస్వి మనోహరిని ". రస విభావరి అంటూ చక్కగా నిర్వచించారు.

"శ్రీ కృష్ణ గానం" శీర్షికతో "మనసే మల్లెల పూబాలై.... మరలిపోయనే బృందావనానికి, మాధవుని అందెల రవళిలా, అల్లుకుపోతిని లతనై-గతినై , పరవశి నైతిని వలపుల చెలినై, అని వ్రాస్తూ ,  భావ కవితా ఝరిలో సాగిపోతూ, కృష్ణ గానం శీర్షికలో ఊయలలూగుతూ , మధురానగరిలో మలయ మారుతంలా ,మధురమై విహరిస్తూ , గీతమై పాడుతూ, మాధుర్యం చిందిస్తూ "అందరివాడూ  ఐన అల్లరి మోహనుడిని తలచిన చాలును , అందరి మనసులు మురియునంటూ, మృదు మంజుల గానాలు ,వెన్నెల మాటున పొంచి యున్న కన్నియల మనసు దోచిన వాడు , గోవులుగాచు గోప బాలుడు, అందరి మనసులు గెలిచాడు నంద నందనుడు, అల్లరి మాధవుడు , అంటూ ,కృష్ణ భక్తిని చాటుతూ, భక్తి పారవశ్యంలో మైమరిచిపోతూ ,తన్మయత్వంతో రాసిన కృష్ణ గానామృత తరంగాలు,  కన్నయ్య గురించి మృదు మధురమైన బాణిని పలికిస్తూ, వేణువు వీణలో లతగా అల్లుకుపోతూ ,  తీగలుగా సాగిపోతూ,రాసిన  ప్రతి కవనము ఆణిముత్యమై ,అక్షరాల సొబగుల సాగుతూ ,చక్కటి పద బాణిలో పరుగులెత్తుతూ రచించిన తీరు అద్భుతం.

"పెళ్లి పాటలలో," పెళ్ళికొడుకు రాకనుండి మొదలుపెట్టి ,

ఆది శేషాద్రిపై వెలసిన మా దేవుడు, ఆపద మ్రొక్కులు తీర్చేడివాడు, అంటూ సాగిన , పెళ్లికూతురు గౌరీ పూజతో శ్రీకారం చుడుతూ, తోట సంబరం శీర్షికతో ,కర్పూరపు సుగంధాలు వెదజల్లుతూ,  జాజులు, మల్లెల మాలలు అల్లుతూ ఆట-పాటల ఆనందములతో ,పసుపు కుంకాలు పంచుతూ , పరవళ్ళు త్రొక్కుతూ, పారాణి  పాదాలతో , పన్నీటి గంధాలతో తేనెల మాటల పిలుపులతో , అంగనలిచ్చే హారతుల వంటి భావామృతాలతో విశేషం గా ఉన్నది .

ఆడవారి పెళ్లి పాటలు,  మగవారి పెళ్లి పాటలు, చక్కగా ఉదాహరిస్తూ , పెళ్లి పిలుపుతో "కళ్యాణము చూతము రారండి, శ్రీ వెంకటరమణుని " అని ఆహ్వానిస్తూ , ఇరు భార్యల నురమున నుంచి,  మురిపెపు నగవుల ముడుపుల దోచి, కరుణతో కరముల నభయమునిచ్చి , ఇడుముల బాపుటకు ఇలలో వెలసిన హరి , శ్రీ వేంకటేశ్వరుడు అంటూ,  వెంకటేశ్వరుని పాదాల చెంత అప్పగింతల పాటలతో  కన్నీరు తెప్పించారు .

చుట్టాల సందళ్లతో , దోస ఆవకాయ, గోంగూర ,నేతి పోపుల రుచుల పచ్చళ్ళతో,  గడ్డ పెరుగు, ఐస్ క్రీము ,వంటి  పెళ్లి వంటల  ముచ్చట్లు , అన్ని తినగా తిని ఆయాసాలతో తాంబూలాలు వేసుకుంటూ , కొత్త జంటను "వర్ధిల్లాలని ఆశీర్వదిస్తూ" 

 పెళ్లికూతురని అత్తగారింటికి సాగనంపుతూ , "పుట్టినింటి జ్ఞాపకాలు తీపి గుర్తులై, అత్తింటి గౌరవమే నీకు కీర్తి " అని పెళ్లికూతురుకి మంచి మాటలు చెబుతూ  వ్రాయడం చక్కటి వర్ణనలతో చిక్కటి భావవీచికల మేళవింపుతో మంచి నలభీమపాక రుచులతో విందు భోజనం లాంటి రచనలు అక్షర సుమగంధాల జల్లుల పరవశంతో అందించారు.

మాతృభూమిపై మమతను కురిపిస్తూ "తల్లి భారతి తరలివచ్చెను సప్త  జతి యతి పదముల" అంటూ,

 భారత భూమిలో పాడి-పంటలు , ప్రకృతి సోయగాలు, సూర్య-చంద్రుల కాంతి బింబాలు,  కరుణ నిండిన చూపులు,

వంటి పదాలతో, త్యాగరాయ కీర్తనల సాగుతూ, శ్రీనాధుని సీస పద్యాల రచనల కీర్తి కిరీటాలతో  , క్షేత్రయ్య పదముల అలలై సాగుతూ ,భారత ఖ్యాతి రత్నాలైన వీర పురుషుల రుధిర ధారల తడుస్తూ, మూడు రంగులకు మూలమై, శాంతి సంకేతమై ,ధర్మానికి నిలయమైన, భారత జాతి ఖ్యాతికి సంకేతమైన "పతాక"  రెపరెపలలో , ధర్మ వీచికల పరిమళాలు వెదజల్లుతూ , శాంతి సౌఖ్యాల కల్పవల్లికి స్వాగతం పలుకుతూ, విశ్వశాంతికి పిలుపునిస్తూ,  "భరతమాతకు వందనం " అంటూ,  దేశభక్తిని చాటుకుంటూ, రచించిన తీరు అక్షర జల్లుల పరవళ్ళతో  కదం త్రొక్కుతూ , భావ వీచికలై

సాగే  నదీ తరంగాలవలె  సాగుతూ , జోరుగా జంట పదముల విలసిల్లుతూ వెలువరించిన తీరు అత్యద్భుతం

"ధనుర్మాసము మొదలు,  సూర్యుడు మకర రాశిలోకి ప్రవేశించే సమయం ఆసన్నమైంది "అంటూ మనుజులకు గుర్తు చేస్తూ, ధనుర్మాసంలో నెల రోజులు గోదాదేవి, గోవిందుని స్తుతించి భర్తగా  పొందినటువంటి పుణ్య దినములను గుర్తు చేస్తూ, మొదటి రెండు పాశురాలలో,  రంగనాథుడి మేలుకొలుపులు పాడుతూ ,ముల్లోకాలను కొలిచిన త్రివిక్రముడంతటి వాడని , పొగుడుతూ ,మార్గశిర దినకరుడి గురించి ,మహిమలన్నీ తెలుపుతూ , గోదాదేవి మధురానుభూతిని, మధుర భావనలను ,తన అక్షరాల పంటలో పండిస్తూ,  మూడు వేదాలకు మూలమైన స్వామిని ,"నిత్య సత్యానందుడు, నిర్మలాత్ముడు ,నిర్వికారుడు ,అయినా సశంఖ,పద్మ,గదా చక్రాల ధరించి ,విశ్వమంతా నిండిన విశ్వంభరుడని , 

శ్రీ రంగనాథునికింపైన తులసి దళాలతో ,సొంపుగా మాలలు అల్లి ,మంగళం అర్పిస్తూ, నీ రాకకై వేచియున్నానంటూ,  ఆర్తిగా పిలిచిన గోదాదేవి ప్రార్థనలను చక్కటి పద బాణిలో కూర్చుచు, వేద-మంత్రాలు,  పల్లకి సేవలు ,మేలుకొలుపులతో,ఆ భాగవతోత్తముని ,భానుతేజస్సు నిండిన వానిని భక్తి భావాలతో కొలుస్తూ, భవ బంధాలను వదిలించుకుంటూ ,బంగారు కడియం  తొడిగిన పాదమును కొలుచుచు,  సాధు సంరక్షకుని, ముక్కోటి దేవతల భయము బాపేటువంటి భాగవతోత్తముని,  కోరినంతనే కోర్కెలు తీర్చేవానిని, సాదు సంరక్షకుని , హరి పురుషోత్తముడిని ఆశ్రయించితిని , ఆదుకొనగా రావయ్యా" అంటూ ఆర్తిగా పిలుస్తూ ,30 రోజులు 30 తీరులుగా పూజిస్తూ, చేసిన అర్చన సార్ధకములుకాగా ,కాత్యాయినీ వ్రతమును ఘనముగా చేసి, మంగళ కరుణ్ణి మనసారా పూజించి, మంగళముల నిమ్మని వేడగా , శ్రీరంగనాథుడు ప్రత్యక్షమై గోదాదేవిని కళ్యాణమాడిన ఘట్టం , అత్యద్భుతంగా వ్రాసిన విధము ఆదర్శమై నిలిచేలా వ్రాసిన విధానం చాలా బాగుంది.  మధురా నగరిలో మొదలైన భక్తి తత్పరత ,ఇంతింతై వటుడింతై అన్నట్లు మధురభావనారసపరిమాళను ఆస్వాదిస్తూ చదువరులకు భక్తి పారవశ్యాన్ని కలిగిస్తూ వ్రాసిన అక్షరామృతాలు ఈ రచనలు . 

విభిన్న అంశాల సమ్మేళనం. వాస్తవ దృక్కోణం .సునిశిత పరిశీలన ,చదువరులందరిని కృష్ణ భక్తిలో కట్టిపడేస్తూ అక్షరాల అల్లికల జిగిబిగిలో పాఠక లోకం ఆసాంతం ఆస్వాదించి చదివేలా రచన సాగుతుంది. 

 అలాగే వీరు తమ కవితా పటిమను ప్రదర్శిస్తూ,  నలుగురికి ఆదర్శంగా నిలుస్తూ , మరెన్నో కవితా సంపుటాలు వీరి కలం నుండి జాలు వారాలని ,  మనస్ఫూర్తిగా ఆకాంక్షిస్తూ , మీ గీతా శైలజ.

జై శ్రీకృష్ణ

కొమరగిరి గీతాశైలజ

సి.ఆర్.పి యఫ్ పబ్లిక్ స్కూల్

తెలుగు టీచర్ (యస్ ఏ)

అల్వాల్

సికింద్రాబాద్