అంశం : ఏ.పీ.జె. అబ్దుల్ కలాం..

/10/2024.

వారం : మంగళవారం

మహతీ సాహతీ కవి సంగమం.

అంశం : ఏ.పీ.జె.  అబ్దుల్ కలాం.

ప్రక్రియ :గేయం.

రచన : శ్రీమతి పుల్లాభట్ల జగదీశ్వరీముార్తి .

కల్యాణ్. మహారాష్ట్ర .

మ.స.క.సం.: 43

పల్లవి : 

మంచి మనిషిగా ఎదగాలంటే 

విద్యాబుద్ధులు నేర్వాలిరా 

సాధువర్తనము, సకలజనహితమే 

మనసులు గెలిచే సాధన రా !!

అనుపల్లవి:

యెంచి సాధనతో సాధించేటి

 విజయ గాధలు ఎన్నో రా 

అబ్దుల్ కలాము జీవిత చరితే ,

 సాక్ష్యమొకటిగా తెలియుము రా!!

1.చరణం:

ఆర్థిక బాధల నొడ్డి, యాతడు, 

చదువుల సంద్రము దాటెనురా

శాస్త్రవేత్తగా "క్షిపణుల" కనుగొని 

సాధ్యమసాధ్యము చేసెనురా

"భారతదేశపు రాష్ట్రపతిగ "పదవందిన 

మానవ మాన్యుడురా

"మిస్సైల్ మేన్ "గా పేరొందిన ఘన

 చరితకు అతడే  సాక్ష్యమురా !!

.2.చరణం:

చదువును మెచ్చిన పిల్లల స్నేహమే

" కలాము "మెచ్చిన బాటదిరా

మంచి మాటలను ప్రసంగించుటే 

"కలామ్" కు నచ్చిన మాటదిరా

"భారతరత్నగ " కీర్తికెక్కిన 

బాధ్యత నిండిన బంధుడు రా 

"ప్రతిష్టాత్మకా పురస్కారముల"

 చేపట్టిన ఘన గౌరవుండురా!!

3.చరణం:

చిరస్థాయిగా చరితను నిండిన,

 మానవ జన్మమే  ధన్యము

"అబ్దుల్ కలాము" నాదర్శముగా

 నెంచు చదువులే సార్థకము

"అబ్దుల్ కలాము" పురస్కారముల

"నందుకొనుటె, గర్వ కారణము

ఇటువంటి చరితలే దేశ  మకుటమున

 "కలికి తురాయి" సమానము !!

ముగింపు

చరితలందు ఘన చరితలు ఎన్నో

 చదువు  నిండు,సంస్కారాలెన్నో

విద్వత్ నిండిన విద్యలు నేర్పిన, 

‌విషయ సంపదల వేడుకలెన్నో..!!

----------------------