చంద్రఘంటా! వందనం!*కవి: *వరలక్ష్మి యనమండ్ర* )*ప్రక్రియ: *పద్యము(తరళము

*మహతీ సాహితీ కవిసంగమం*

*ప్రతిరోజూ కవితా పండుగే*

అంశం:  *చంద్రఘంటా!* 

కవితాసంఖ్య: *03*

తేది: *05-10-2024-శనివారం*

శీర్షిక:  *చంద్రఘంటా! వందనం!*

కవి:  *వరలక్ష్మి యనమండ్ర*    ‌‌కవి సంఖ్య *(02)*

ప్రక్రియ: *పద్యము(తరళము)*

*****************************

*01*

సకల లోకములందుగొల్చెడు చంద్రఘంటా వందనం!

చికురముల్ భ్రమరంబులయ్యెను శ్రీకళా శుభ స్వాగతం 

వికలమయ్యెను సృష్టియంతయు వేడుచుంటిమి భక్తితో 

ముకుళితంబయె నాదు దేహము మ్రొక్కుచుంటిని పార్వతీ!

*02*

పదపదంబుల నీశు దల్చుచు భక్తితో తపియించగన్ 

ముదమునొందిన నీలకంఠుడు ముగ్ధుడయ్యెను శాంభవీ 

వదనమంత ప్రకాశమై, హిమవంతు, మేనక మెచ్చిరే 

కదము ద్రొక్కెను సంతసంబులు కాంతపార్వతి మోమునన్!

*03*

తొలుత ధూర్జటి నిన్ను జూడగ తొందరించె గణంబులన్ 

కొలుచు భూతపిశాచముల్ గని కూలిపోయెను మేనకే 

పలికె పార్వతి చంద్రఘంటయి వస్త్రభూషణ శోభలన్ 

తళుకులొల్కెను సుందరేశుడు , తారలే దిగివచ్చెనే

*04*

రథమునెక్కె వివాహమై; శివరాణిగా యరుదెంచెనే

పథపథమ్మున దేవతల్ గని పారవశ్యము నొందిరే 

వ్యథలుబాపగ చంద్రఘంటగ పార్వతీ యవతారమే 

కథలుగావివి వాస్తవంబులు కామితార్ధము లొందగన్

*05*

గదనుబట్టిన సింహవాహిని ఖడ్గధారిణి శాంకరీ 

కదనమందున దైత్యహారిణి ఘంట నాద వినోదినీ 

సదనమందున కొల్వు సేయవె చండికా యవతారీణీ 

సదయవై మముగాచు తల్లివి చంద్రఘంటవు నీవెగా!

*****************************

హామీ పత్రం: స్వీయ రచన