నేను ప్రేమ పిపాసిని ( కవిత).

02/05/2023.

తపస్వీ మనోహరం "e " సంకలనం కొరకు..

అంశం : ప్రేమ.

శీర్షిక  : నేనో ప్రేమ పిపాసిని .

రచన : శ్రీమతి :పుల్లాభట్ల  జగదీశ్వరీముార్తి

ఊరు: కల్యాణ్ . మహారాష్ట్ర .

రెండక్షరాల ప్రేమ

నన్ను జ్ఞాపకాల పడవలో 

ఊగిసలాడిస్తోంది.

తొలిసారి నిన్ను చూసిన క్షణాలు

నా మస్తిష్కపు పొరల్లో 

కొట్టుమిట్టాడున్నాయి.॥

అనుభూతుల  ఆనందాలు

వలువలై నా మేనిని కప్పేస్తుంటే

నిన్ను చూడని ఒక్కో క్షణం ఒక మరణంలా..

విరహ వేదనకు వంతు పాడుతున్నాయి ॥

 గుండెల్లొ చెప్పలేని వ్యధ ..

 చలిస్తున్న కనురెప్పల్లో కన్నీళ్ళు సంద్రమైనపుడు...

క్షణికమైన అస్పష్టపు  బాధ ముఖంపై 

నీలినీడై  ప్రతిఫలించినపుడు ,

నాకేమీకాని నువ్వు, నా కన్నీటి చుక్కవై 

నా చంపల్ని ప్రేమగా  స్పృశిస్తావు. 

 నీ స్మృతుల అలలతో దారి మళ్ళించి

గతాల ఆనంద తీరాలకు లాక్కుపోతావు.॥

 

నువ్వు నన్ను వదిలి వెళ్ళిన జ్ఞాపకాలు

భగ్నమైన మనసు పొరల్లోంచీ పయనించీ.

కవితాక్షర ప్రణయ కావ్యాలై , నిన్ను చేరి

నీ గుండె లయల స్పందనై  నినదించినపుడు  ....

నీ మనసులో నీలి నీడల జ్ఞాపకాన్నై

నీ మదిలో  ,నేనే నీవుగా నిలిచిపోతా ॥

హామీ : 

పై కవిత నా స్వీయ రచన .

-----------------------------