శీర్షిక: *కాళరాత్రీ దేవీ!నమోస్తుతే*కవి: *పొర్ల వేణుగోపాలరావు*

*మహతీ సాహితీ కవిసంగమం*

*ప్రతిరోజూ కవితా పండుగే*

అంశం:  *కాళరాత్రీ దేవి!* 

కవితాసంఖ్య: *07*

తేది: *09-10-2024-బుధవారం*

శీర్షిక:   *కాళరాత్రీ దేవీ!నమోస్తుతే*

కవి:  *పొర్ల వేణుగోపాలరావు*  

ప్రక్రియ: *పద్యము(తరళము)*

**************************

*(1)*

*ధరణి నేలెడు లోకమాతవు!దైత్యహారిణి! కాళికా!*

*ఖరము నెక్కిన కాళరాత్రివి!ఖడ్గధారిణి!వందనం!*

*పరమ పావని!భీషణా!ప్రతిబంధ నాశని!చీకటీ!*

*వరము లీయవె!శత్రునాశని!ఫాల నేత్రి!దిగంబరా!*

*(2)*

*అగజ దేహము నుండి వచ్చిన యాగ్రహంబుల జ్వాలవే!*

*భగభగా దహియించి బూదిగ వైరులన్ కడ తేర్చుమా!*

*అగణితా!కరుణాంబు రాశి!సహస్ర చక్ర నివాసినీ!*

*ప్రగతి కారిణి! సిద్ధి దాయిని!రౌద్రి!నీకిదె వందనం!*

*(3)*

*శుభములిచ్చెడు లోకమాతవు! క్షుద్రశక్తుల నాశనీ!*

*అభయమీయవె! దుష్ట హారిణి! యగ్రపూజలనందుచున్!*

*విభవమందిన యుగ్రరూపిణి!భీకరోగ్ర త్రయంబికా!*

*రభస జేయవె రౌద్ర రూపి!కరాళనృత్యము జేయుచున్!*

**************************

హామీ పత్రం: *స్వీయ రచన*

🙏🌹🙏🌹🙏🌹🙏🌹🙏

*వేణుగోపాలుడు*