శీర్షిక: *సిద్ధి దాత్రీ!నమోస్తుతే*కవి: *పొర్ల వేణుగోపాలరావు* ప్రక్రియ: *పద్యము(తరళము)*

*మహతీ సాహితీ కవిసంగమం*

*ప్రతిరోజూ కవితా పండుగే*

అంశం:  *సిద్ధి దాత్రి!* 

కవితాసంఖ్య: *09*

తేది: *11-10-2024-శుక్రవారం*

శీర్షిక:   *సిద్ధి దాత్రీ!నమోస్తుతే*

కవి:  *పొర్ల వేణుగోపాలరావు*  

ప్రక్రియ: *పద్యము(తరళము)*

**************************

*(1)*

*నవవిధంబుల రూపు దాల్చిన నైపుణీ! యిదె స్వాగతం!*

*నవ దినంబులు బూజలందిన నవ్య రూపిణి! వందనం!*

*నవశకంబును పాదుగొల్పగ నైతికోన్నతి నీయవే!*

*యువతరంబున భక్తి వాంఛను యుక్తిగా కలిగించుమా!*

*(2)*

*రణములందున రాక్షసాంతకి! రక్షసేయుము విశ్వమున్!*

*మణుల ద్వీపము నీ ప్రపంచము! మంత్రరూపిణి! మాతరో!*

*అణిమ యాదిగ యష్టసిద్ధుల నన్ని యిచ్చెడు తల్లివే!*

*గణము లన్నియు గొల్చు దేవివి! కావు మమ్ము పరాత్పరా!*

 *(3)*

*భవుని దేహము నందుభాగము బంచుకొంటివి భార్యవై!*

*నవమి యందున సిద్ధి దాత్రిగ నాకు బుద్ధినొసంగుమా!* 

*భువనమంతయు నీకటాక్షము! పూజలందుము!దాత్రివై!*

*కవనమందున స్తోత్రమున్ గని కన్నబిడ్డను బ్రోవుమా!*

*(4)*

*అఘటనా ఘటనాదిశక్తివి! యాదరించవె భక్తులన్!*

*విఘటనంబగు పాపమంతయు వీక్షణంబులు సోకగన్!*

*లఘిమయాదిగ యష్టసిద్ధుల లబ్ధి గూర్చెడు మాతరో!*

*అఘములన్నియు నంతరించును నమ్మవై కరుణించుమా!*

*(5)*

*పిలచి నంతనె బల్కు తల్లివి! బిడ్డలందరి క్షేమముల్*

*తలచుకొందువు మాతగా మము దారితప్పక జూచుచున్!*

*కొలిచినంతనె కోర్కెదీర్తువు!కొంగుబంగరు రాణివే!*

*మలచవే మము మంచిగా! మది మందిరంపు ప్రతిష్టితా!*

**************************

హామీ పత్రం: *స్వీయ రచన*

🙏🌹🙏🌹🙏🌹🙏🌹🙏

*వేణుగోపాలుడు*