శీర్షిక : అసమానతల జీవిత పోరాటం.

శీర్షిక : అసమానతల జీవిత పోరాటం.

రచన : శ్రీమతి , పుల్లాభట్ల జగదీశ్వరీమూర్తి .

కళ్యాణ్ :  మహరాష్ట్ర.

మనిషి ఎదురుగ, నిలిచిన కష్టాల కొండ,

గుండె నిండా ధైర్యం ఒక్కటే అతనికి అండ.

నేలపై తడబడి  కాలు జారినా, నిరంతరం

 నిలబడాలన్న తపన అతని అజెండా !!

సవాళ్ళ సుడిలో చిక్కుకున్నా గాని,

ఆశల దీపం మాత్రం ఆరని జ్వాల.

రేపటి వెలుగు కోసం చేసే నిరీక్షణలో

ప్రతి అడుగులోనూ ఒక పోరాట లీల !!

ఒంటరి పోరాటంలో కనబడని సమస్యలు. 

కన్నీటి చుక్కలే వాటికి దారి చూపే గువ్వలు.

పట్టుదల అనే బలమైన ఊతంతో,

జీవితపు నదిలో ఎదురీతల  కలకలలు .!!

ఓటమి అంచున నిలిచినా కానీ,

మళ్ళీ లేచే శక్తి అతని సొంతం.

కాలం చేసే గాయాలకు మందుగా,

నిబ్బరం నింపుకున్న ధీరత్వపు పంతం.!!

అసమానతల నీడలు కమ్మినా, అతనిలో

ఆత్మ విశ్వాసం వెలిగే కాంతి పుంజం.

ఈ పోరాటం ఒక అందమైన తలపైతే

మనిషిలోని ధైర్యానికి ఇది నిదర్శనం.!!

ప్రతి కష్టం ఒక మలుపు తిరిగే కథ,

ప్రతి పోరాటం ఒక కొత్త ఉదయమేకదా.

అసమానతల మధ్య సాగే ఈ ప్రయాణం,

మనిషిని బలవంతుడిని చేసే మహా యజ్ఞం.!!

------------------------------------