తరంగిణి పాట.తరతరాల సాంప్రదాయ సౌగంధపు వాహినీ రంగరించు రాగసుధల సంగీత మోదినీ ॥ గిరులు, ఝరులు , విరులు , తరు- లతాపూరిత భూషిణి ॥ వాణీ వర- వీణారవ రమ్య రస సుపోషిణీ ॥ ఆమని భరతావని. ...... సమత, మమత సమ భావన నిండు నిర్మలావనీ ........ ॥ ఆదర్శపు అడుగులసిరి ఆణిముత్యముల ఖని ॥ అనురాగము పంచు నిధుల నిండు నిత్య యౌవ్వని ... ॥ ఆట, పాట , కవుల ,కళల నాదరించుపాధినీ .... ॥ అహ -రహములు శాంతి బాట , నడచు కల-సుభాషిణీ .... ॥ ఆమని... భరతావని సమత , మమత , సమ భావన నిండు నిర్మలావనీ .........॥ __________________________

"తరంగిణి "(ప్రారంభ గీతం ). 

_______________________________

తరతరాల సాంప్రదాయ 

సౌగంధపు వాహినీ 

రంగరించు రాగసుధల 

సంగీత మోదినీ ॥

గిరులు, ఝరులు , 

విరులు , తరు- 

లతాపూరిత 

భూషిణి ॥

వాణీ వర-

వీణారవ 

రమ్య రస 

సుపోషిణీ ॥

ఆమని భరతావని. ...... 

సమత, మమత

సమ భావన 

నిండు నిర్మలావనీ ........ ॥

ఆదర్శపు  

అడుగులసిరి 

ఆణిముత్యముల

 ఖని ॥

అనురాగము 

పంచు నిధుల 

నిండు నిత్య 

యౌవ్వని ... ॥

ఆట, పాట , 

కవుల ,కళల

నాదరించుపాధినీ .... ॥

అహ -రహములు 

శాంతి బాట ,

నడచు

కల-సుభాషిణీ .... ॥

ఆమని... భరతావని

సమత , మమత , 

సమ భావన  

నిండు నిర్మలావనీ .........॥

_________________________________

_____________________________________

ఇదె మా అంజలి గొను..

(ఫిబ్రవరి 10TH 2011 గురువారం ,రాధసప్తమి నాడు " హరిహరకళాక్షేత్రం " హైదరాబాద్ లో "శివపద సప్తాహం " జరిగిన  సందర్భం గా గురువుగారు" శ్రీ సామవేదం షణ్ముఖ శర్మ" గారికి గౌరవ పూర్వకంగా  సమర్పించిన " స్వర పుష్పాంజలి "

శణ్ముఖాంజలి .(ప్రారంభ గీతం )

--------------------------------------------------

ఇదె మా అంజలి గొనుమా గౌరవగురు జననుతా 

షణ్ముఖ శర్మ నామా కారణ జన్మాద్భుతా 

నిపుణ పురాణాది ధనీ  , గుణ సద్గుణ జ్ఞానఖనీ 

 వాజ్మృదు  గంభీర స్ఫూర్తి  వరభూషిత విభూతీ ॥ ఇదెమా ॥ 

అహరహములు శ్రమియించీ , అంబ శివుని అర్చించీ 

మహా గ్రంధ సారమ్మును అందించిన  ఘనగురూ 

సహస్ర దివ్య శివ-మహిమలె , కీర్తనలుగ రచియించితి -

విహపర సాధన ఘనములు ,అవియే మా ధనములు ॥ ఇదేమా ॥ 

శివ-శక్తుల జపియించుటే నిత్య కర్మాగా, ఆ 

శివ లీలలు గిరి కీర్తులే నోటిపలుకుగా ...... 

శివార్పణము నీ దేహము ,శివమయమే జీవనమూ 

నీ గమనమే శివ పథమూ , నీ తలపులే శివపదం 

శివపదం ..... ఈ.... శివపదం ....... 

శివకృప  కలిగిన వేదం , నీ రచనీ శివపదం ... 

_________________________________         

_____________________________

అమరగీతం.

అమరగీతి.  (యే మేరె వతన్ కె లోగో వరస )

--------------------------------------------------------

మన దేశం హక్కులకోసం  

పోరాడే వీరులనేకం 

గుర్తించీ  వారి త్యాగం   

కన్నీరిడరే  కొంచం ॥ 

శతృవుల  గుండెలు చెండీ , 

తూటాకు బలైనారండీ 

అమరత్వం పొందిన యువత 

 నిలబెట్టిరి ఝండా ఘనత ॥

గాంధీ పోరాడిన దేశం , 

నెహ్రూజీ కోరిన సంఘం 

అందించీ మనకు స్వాతంత్ర్యం ,

అసువులనే బాసిన సత్యం ॥మన ॥  

 జాతి మతాలను వీడి ,

ఒకటై మని స్నేహం తోడి 

చిందించిన రక్తం భువిపై , 

ప్రవహించెను నదులై ఝారులై ,॥

ఒక తల్లికి మిగిలెను శోకం ,

తెగే భార్యకు మంగళసూత్రం 

అర్పించిన ఆత్మ త్యాగం ,

అది మననం చేసుకో నిత్యం ॥ మన ॥ 

ఈ భారతి ముద్దుల పంట ,

గర్వించే ఈ యువతంతా 

మనమంతా ఒకటే శక్తి , 

ప్రవహించే రక్తం ఒకటి ॥

చిరునవ్వులు మోమున నింపి , 

స్వాతంత్ర్యపు విందులు పంచీ 

నిలపెడదాం ఝండా చరితా , 

జై కొడదాం లేవండంతా ॥ మన ॥ 

-----------------------------------

రచన, శ్రీమతి , 

పుల్లాభట్ల జగదిీశ్వరిీముార్తి.

కల్యాణ్. ( మహరాష్ట్ర .).

-------------------------

____________________________________________

పాడవోయి విజయగీతి.

స్వాతంత్ర్య గీతి . 

------------------------

పాడవోయి విజయగీతి 

పుడమితల్లి వెలుగుకీర్తి 

అమరులైన వారి స్ఫూర్తి 

స్మరియించే వరదినం 

స్వాతంత్ర్యపు శుభదినం ॥ 

సమసమాన భావనతో కలసిపోదమీదినం 

కులమతాల భేదములను కూలద్రోయుటె ధనం 

తరతరాల చరితలకే నిలువుటద్దమీదినం  

వీరగతిని పొందు ఘనుల త్యాగఫలము ఈ దినం ॥ 

స్వాతంత్ర్యపు హక్కులనే పొందినార మీదినం 

భరతమాత కీర్తి ఘనత చాటి నిలుపు గౌరవం  

సత్య,ధర్మ , శాంతి గురుతుగా ఝండా నిలుపుదాం 

చేయి చేయి కలిపి మాత ఒడిని శాంతి నిలుపుదాం ॥ 

అహింస దారి అడుగులేసి ఆగడాలనాపుదాం 

ఆదర్శపు బాట నడచి ఆనందం పంచుదాం 

సమత మమత పంచి భరత మాత కీర్తి పెంచుదాం 

మన ఝండా ఎగురవేసి విశ్వశాంతి నిలుపుదాం ॥ 

-------------------------------------------------------------

రచన, శమతి,

పుల్లాభట్ల, జగదిీశ్వరిీముార్తి.

కల్యాణ్. ( మహరాష్ట్ర ).

---------------------------------

___________________________________________

 

నవ్వవే బంగారు పాపా ॥

నవ్వవే ఓ పాప బంగారు పాపా ....
కల్లకపటము లేని బోసి నవ్వుల మొలక
నీ నవ్వు ఏడేడు లోకాల గెలుపు
ఆనంద లోకాల విహరించు పిలుపు ॥ నవ్వవే ॥

చిదమ బుగ్గలు కారు చిక్కన్ని పాలు
లేలేత పెదవులే ముద్ద  మందారాలు
కలువ వంటీ కనులు చిలుకు వెన్నెలలు
నీలోని అందాలు విరిపారిజాతాలు ॥ నవ్వవే ॥

చిట్టి పొట్టీ నడక వయ్యారితనమొలుక
ముద్దు మాటలు తీపి తేనేల్లు చిలుక
చిన్ని అల్లరితోడ చేయు మురిపాలు
మా యింటి సందళ్ళు ,ఆనంద పరవళ్ళు ॥ నవ్వవే ॥ 

తేట తెల్లని దినుసు ,అద్దమంటీ  మనసు
ఆట,పాటల తీరు ముద్దు ముచ్చట మాకు
హాయినిచ్చే సిరులు పసిపాప పరవళ్ళు
నిన్ను వలచనివారు ఈ జగములో లేరు ॥ నవ్వవే ॥

తొందరెందుకు నీకు ఎదిగి ఏం చెస్తావు
వింత లోకపు తీరు , మర్మమెరుగవు నీవు 
ఆటు పోట్లకు నలిగి విసిగి అలసిన నీవు
ఏ ఏ టి కాయేడు నవ్వు మరచెదవీవు ॥ నవ్వవే ॥

---------------------------------------------------

-రచన, శ్రీమతి,

పుల్లాభట్ల జగదిీశ్వరిీముార్తి.

కల్యాణ్.( మహరాష్ట్ర ).

--------------------------------------------------
---------------------------------------------------